|
13 Çile 2010
‘Flamenko Kurdo’ Jan JiyanIKKURD.com)
MUZIKKURD.COM
Jan Jiyan di muzîka kurdî de deng û rengekî nû ye. Jiyan bi
tarzê muzîka latînî, Flamenko distrê û balê dikişîne û dê di
demeke nêz de bi navê ‘Gula Bêwext’ bigihîje hezkiriyên muzîkê
Min cara yekem li Gelsenkirchenê di 17’emîn Mîhrîcana Çanda
Kurdan de lê guhdarî kir. Di vê mîhrîcana ku bi hezaran kes
beşdar bûbûnê de hunermendên gelek bi nav û deng beşdar bûbûn.
Di vê mîhrîcanê de ji aliyê çepê yê sahneya navendî ji bo dengên
nû û ciwanan sehneyek hatibû çêkirin û Jan Jiyan jî di wê
sahneyê de stra.
Li ser sahneyê gelek kes hebûn û mirov nikaribû gav biavêta. Li
ser dikê piştî dengbêj, muzîka kurdî ya klasîk û ya gel Jan
Jiyan derket ser dikê û bi muzîka Jan Jiyan a latînî ve ciwan
hinekî bêdeng bûn. Guhê kesên ku beşdarî mîhrîcanê bûbûn ne
xerîb bû lê di çalakî û bernameyeke kurdistaniyan de yekem car
mirovan meraq dikir ka bi muzîka latînî ve kurdî çawa bê stran.
Jan Jiyan bi germahiya rîtmên muzîka latînî ve bi kurdî strana
‘Ciwan’ got. Dema Jan Jiyan dest bi gotina stranê kir coşa ciwan
careke din dest pê kir. Piştî ku stran qediya ciwanan bi çepikan
Jan Jiyan pêşwazî kir.
ZAROKÊ MEZOPOTAMYAYÊ
Piştî çend rojan albuma Jan Jiyan a yekem bi navê ‘Gula Bêwext’
dê derkeve. Jan Jiyan di sala 1979’an de ji dayik bûye û xwe
wekî zarokê Mezopotamyayê bi nav dike û wiha dibêje: “Em tu
cudahiyekê naxin nav xwe û em bi tevahî zarokên Mezopotamyayê
ne. Kurd, asûrî, suryanî, ermen hemû bi hev re zarokên wê axa
bibereket in.”
FLAMENKO KURDO
Jiyan tarzê muzîka xwe wekî tarzê latîno kurdî bi nav dike û
eleqeya wî ya ji bo muzîka latînî di temenê biçûk de dest pê
kiriye. Jan Jiyan anî ziman ku hemû muzîkên xwe bi kurdî çêdike
û bi taybetî jî di bin bandora koma muzîkê ya romanên fransî ya
bi navê Gipsy Kingsê de maye. Jan Jiyan diyar kir ku dema hê li
welat dijiya ev kom nas kiriye û her tim muzîkên vê komê guhdar
kirine. Piştî ku diçe Ewropayê çend endamên komê nas dike û êdî
ev muzîk ji bo wî dibe tarzê jiyanê.
Jan Jiyan li hinek restaurant û barên îspanyayî derketiye straye
û wiha axivî: “Dema min nû dest bi gotina stranan kir hem min
şerm dikir û hem jî amator bûm. Lê mirov radibûn piyan û li
çepikan didan. Ez gelekî kêfxweş dibûm. Piştî ku min ev eleqe
dît min got gel biyanî wiha ji bo min li çepikan bidin ez çima
bi muzîka xwe ve dernekevim pêşberî gelê xwe. Ez wisa fikirîm ku
gel jî dê li tarzê muzîka min xwedî derkeve.”
Jan Jiyan wiha behsa naskirina endamê koma muzîkê Gipsy Kingsê
kir: “Min li Almanyayê çend endamên komê nas kirin. Min ji wan
re got ez ji muzîka we gelekî hez dikim û her çiqas profesyonel
nebe jî ez ji muzîka Flamenko hezdikim û bi amatorî vî cureyê
muzîkê distrêm. Ji ber ku yekî biyanî eleqeyê nîşanî muzîka wan
dide ew jî kêfxweş bûn. Ji min re gotin tu ji ku yî min jî got
ez kurdistanî me û gotin em kurdan nas dikin û bêtir eleqe
nîşanî min dan.”
Jan Jiyan bi kurdî li cem wan distrê û çend caran tevî endamên
komê derdikeve ser dikê. Piştî vê pevajoyê bêtir li ser muzîka
latînî radiweste û li gorî muzîka latînî gotinan dinivîse. Jan
Jiyan niha hê jî li Almanyayê dijî û di hin bernameyên cuda de
derdikeve ser dikê û rastî eleqeyê tê.
‘GULA BÊWEXT’
Jan Jiyan bi qasî 3 salan e li ser albumekî dixebite û di demek
e nêz di bi navê ‘Gula Bêwext’ albumekî ve digihêje hezkiriyên
muzîkê. Her wiha ji bo vê albumê piştgiriya herî mezin koma
muzîkê Gipsy Kings dayê. Hemû gotinên strana yên di albumê de
cih digirin aîdî Jan Jiyan in û her wiha dîsa muzîk jî aîdî wî
ne. Di albuma yekem a Jan Jiyan de hemû stran bi kurdî ne û
Jiyan bi lêv kir ku zimanê îspanyolî dizane û dê di albuma
duyemîn de cih bide stranên îspanyolî jî.
Jan Jiyan anî ziman ku tarzê hunera wî ne tam latîno ye û ne jî
tam kurdî ye û wekî bêndera her duyan ango wekî ‘Flamenko Kurdo’
bi nav dike. Jan Jiyan bi lêv kir ku her roj bi muzîkê re
eleqedar dibe û bê muzîk nikare bijî û di muzîka kurdî de deng û
rengekî nû ye û dê muzîka Amerîkaya Latînî ya bi coş û germ bi
kurdî bistrê. Her wiha ji bo gerdûnîbûna muzîka kurdî jî dê fêda
wî çêbe. (MUZIKKURD.com)
|
